राम प्रसाद अधिकारी ,
डालस (टेक्सास) — नयाँ वर्ष २०२६ को शुभअवसरमा टेक्सासको युलेस सहरमा रक्तदान कार्यक्रम आयोजना हुने भएको छ। आगामी आइतबार, जनवरी ११, २०२६ का दिन नेपाली सांस्कृतिक तथा आध्यात्मिक केन्द्र (NCSC), नेपाली मन्दिर, 1212 Royal Pkwy, Euless, TX 76040 मा उक्त कार्यक्रम सञ्चालन गरिने आयोजकले जनाएका छन्।
कार्यक्रम बिहान ११:०० बजेदेखि दिउँसो ३:०० बजेसम्म चल्नेछ। “तपाईंको एक थोपा रगतले तीन जनासम्मको ज्यान बचाउन सक्छ” भन्ने सन्देशसहित आयोजना गरिएको यस रक्तदान अभियानमा समुदायका सबै योग्य व्यक्तिहरूलाई सहभागिताका लागि आह्वान गरिएको छ।
रक्तदानका लागि सहभागीले फोटोसहितको परिचयपत्र अनिवार्य रूपमा साथमा ल्याउनुपर्नेछ। साथै रक्तदाताको उमेर १७ वर्ष वा सोभन्दा माथि र तौल ११० पाउन्ड वा सोभन्दा बढी हुनुपर्ने आधारभूत मापदण्ड तोकिएको छ।
उक्त कार्यक्रम डालस हिमालयन स्पोर्ट्स लायन्स क्लब, डालस एभरेस्ट महिला लायन्स क्लब, डालस हिमालयन महिला लायन्स क्लब, डालस बडीमालिका नेपालीज लायन्स क्लब तथा ब्लड डोनर्स अफ अमेरिका (BDA) को संयुक्त आयोजनामा हुन लागेको हो। हिमालयन स्पोर्ट्स लायन्स क्लबका अध्यक्ष राजेश अधिकारीले सो जानकारी दिनु भएको हो।
आयोजक संस्थाहरूले मानव सेवाको महान कार्यमा सहभागी भई नयाँ वर्षलाई अर्थपूर्ण बनाइदिन सम्पूर्ण समुदायमा हार्दिक अपिल गरेका छन्।
