ड्यालस, टेक्सास — टेक्ससको ड्यालसबाट आफ्नो व्यवसायिक यात्रा सुरू गरेको नमस्ते फर्निचरले ९औँ वार्षिक उत्सव आइतबार भव्य रूपमा सम्पन्न गरेको छ। नेपाली समुदायलाई लक्षित गर्दै सरल, गुणस्तरीय तथा सुपथ मूल्यमा फर्निचर उपलब्ध गराउँदै आएको नमस्ते फर्निचर हाल पेन्सलभेनियासम्म शाखा विस्तार गर्न सफल भएको छ।
वार्षिक उत्सवको विशेष समारोहमा कम्पनीले आफ्ना सेवाग्राहीहरूको निरन्तर साथ, सहयोग र विश्वासप्रति धन्यवाद ज्ञापन गरेको थियो। कार्यक्रमलाई सांगीतिक रूपमा थप आकर्षक बनाउँदै चर्चित गायिका अञ्जु पन्तले आफ्ना लोकप्रिय तथा सुमधुर गीतहरू प्रस्तुत गरेकी थिइन्। उनका गीतहरूले सहभागी दर्शकहरूलाई मन्त्रमुग्ध बनाएको थियो।
कार्यक्रममा नमस्ते फर्निचरका चिफ फाइनान्स अफिसर रोशन घिमिरेले सहभागीहरूलाई स्वागत गर्दै ग्राहकको रोजाइ र आवश्यकताअनुसार आधुनिक तथा गुणस्तरीय फर्निचर उपलब्ध गराउँदै आएको बताए। उनले आगामी दिनमा अझ उत्कृष्ट सेवा र थप विस्तारको योजनाबारे पनि जानकारी गराए।
सो अवसरमा नेपाली समाज टेक्सासका नवनिर्वाचित कोषाध्यक्ष प्रेम थापा, रियाल्टर चन्द्रकान्त उपाध्याय, नायक सुधांशु जोशी, रियाल्टर दिलीप सुवेदी, नेपाल अमेरिका पत्रकार संघका पूर्व अध्यक्ष विकास न्यौपानेलगायत विशिष्ट व्यक्तित्वहरूले नमस्ते फर्निचरको सफलताको कामना गर्दै शुभकामना मन्तव्य व्यक्त गरेका थिए।
कार्यक्रमको सञ्चालन सुरेश दर्पण पोखरेलले गरेका थिए।
