रामप्रसाद अधिकारी
टेक्सास (अमेरिका): नेपाल अमेरिका पत्रकार संघ (नेजा) ले आफ्नो स्थापना दिवसको अवसर पारेर बहुप्रतीक्षित ‘नेजा कन्क्लेभ २०२६’ आयोजना गर्ने भएको छ। आगामी अप्रिल १८ तारिखका दिन टेक्सास राज्यको इरभिङ शहरमा हुने यस कन्क्लेभले अमेरिका मात्र नभई विश्वभर रहेका नेपाली सञ्चारकर्मी, बुद्धिजीवी तथा समुदायका प्रतिनिधिहरूलाई एकै थलोमा जोड्ने लक्ष्य राखेको छ।
‘कनेक्ट, इन्फर्म र युनाइट’ भन्ने मूल नारासहित आयोजना गरिने उक्त कन्क्लेभले नेपाली पत्रकारिताको वर्तमान अवस्था, यसको विश्वव्यापी प्रभाव र प्रवासी नेपाली समुदायका विविध पक्षहरूलाई उजागर गर्ने अपेक्षा गरिएको छ। विशेषगरी, विश्वका विभिन्न कुनामा सक्रिय नेपाली मिडिया र सञ्चारकर्मीहरूबीच अनुभव आदान–प्रदान, सहकार्य र समन्वय बढाउने उद्देश्य यस कार्यक्रमले बोकेको छ।
कार्यक्रम अन्तर्गत विभिन्न समसामयिक र महत्वपूर्ण विषयहरूमा केन्द्रित वक्तृत्व श्रृंखला तथा प्यानल छलफलहरू आयोजना गरिनेछ। ‘संयुक्त राज्य अमेरिकाको विविधता, समुदाय र शक्ति’ शीर्षकमा हुने विशेष सत्रमा अमेरिकी समाजको बहुसांस्कृतिक स्वरूप, त्यसले दिएको अवसर र चुनौतीबारे गहन बहस गरिनेछ। त्यस्तै, ‘ग्लोबल मिडियामा नेपाल: प्रतिनिधित्व, वास्तविकता र विश्वव्यापी दृष्टिकोण’ विषयमा नेपाल र नेपाली पहिचानलाई अन्तर्राष्ट्रिय सञ्चार माध्यमहरूमा कसरी प्रस्तुत गरिँदै आएको छ भन्नेबारे विश्लेषण गरिनेछ।
यसैगरी, ‘मिडियामा विविधता र समुदायका मुद्दाहरू’ सम्बन्धी प्यानल छलफलले अल्पसंख्यक समुदाय, आप्रवासी अनुभव र सामाजिक समावेशिताका विषयहरूलाई उजागर गर्नेछ। प्रवासी नेपाली समुदायमा सामुदायिक मिडियाको भूमिका, सञ्चालन र व्यवस्थापनका चुनौती तथा सम्भावनाबारे अनुभव साझेदारी सत्र पनि कन्क्लेभको महत्वपूर्ण आकर्षणका रूपमा रहनेछ।
नेजा कन्क्लेभ २०२६ ले नेपाली पत्रकारिता क्षेत्रलाई अन्तर्राष्ट्रिय स्तरमा अझ सशक्त बनाउँदै विश्वभर रहेका नेपाली समुदायबीच एकता, सहकार्य र पहिचानको भावना अभिवृद्धि गर्ने विश्वास लिइएको छ। आयोजकले कन्क्लेभमा व्यापक सहभागिताको अपेक्षा गर्दै सबै सरोकारवालाहरूलाई सक्रिय सहभागिताका लागि आह्वान गरेको छ।
