राम प्रसाद अधिकारी , टेक्सास
Nepalese Society Texas (NST) को आयोजनामा “एनएसटी क्रिकेट कप २०२६” आयोजना हुने भएको छ। नेपाली समुदायबीच खेलकुदमार्फत एकता, सहकार्य र सद्भाव अभिवृद्धि गर्ने उद्देश्यसहित पहिलोपटक यस्तो क्रिकेट प्रतियोगिता गर्न लागिएको हो।
संस्थाका अध्यक्ष बिजय भुषाल ले दिएको जानकारी अनुसार, प्रतियोगिता आगामी मे २२ देखि मे २५, २०२६ सम्म Grand Prairie Cricket Ground मा सञ्चालन हुनेछ। Memorial Day सप्ताहन्त पारेर आयोजना गरिने यस प्रतियोगितामा टेक्सासका विभिन्न सहरबाट नेपाली टोलीहरूको सहभागिता रहने अपेक्षा गरिएको छ।
प्रतियोगितामा अधिकतम १२ टोली सहभागी हुन सक्नेछन् भने ‘पहिले आउनेलाई पहिले अवसर’ को आधारमा दर्ता खुला गरिएको आयोजकले जनाएको छ। प्रत्येक टोलीका लागि न्यूनतम ३ खेल सुनिश्चित गरिएको छ भने प्रतियोगिता २० ओभरको ह्वाइट बल क्रिकेट ढाँचामा सञ्चालन गरिनेछ।
NST का खेल संयोजक उजित अधिकारी का अनुसार, प्रतियोगितामा सहभागी हुन इच्छुक टोलीका लागि प्रति टोली १,००० अमेरिकी डलर दर्ता शुल्क तोकिएको छ। विजेता टोलीले ५,००० अमेरिकी डलर नगद पुरस्कार प्राप्त गर्नेछ भने उपविजेताले २,००० अमेरिकी डलर पुरस्कार प्राप्त गर्नेछन्।
आयोजकले यस प्रतियोगितालाई टेक्सासमा बसोबास गर्ने नेपाली युवाहरूका लागि आफ्नो खेल प्रतिभा प्रदर्शन गर्ने महत्वपूर्ण अवसरका रूपमा लिएको छ। साथै, खेलकुदमार्फत समुदायबीच आपसी सम्बन्ध सुदृढ बनाउने र नयाँ पुस्तालाई सकारात्मक गतिविधिमा जोड्ने लक्ष्य राखिएको जनाएको छ।
प्रतियोगितामा सहभागी हुन इच्छुक टोली तथा थप जानकारीका लागि खेल संयोजक उजित अधिकारीसँग सम्पर्क गर्न सकिने आयोजकले जनाएको छ।
