अमेरिका — Non-Resident Nepali Association National Coordination Council – USA (एनआरएनए एनसीसी अमेरिका) ले नेपाल सरकारले सार्वजनिक गरेको “राष्ट्रिय प्रतिबद्धता” योजनाको स्वागत गर्दै अब कार्यान्वयनमा केन्द्रित हुनुपर्ने धारणा व्यक्त गरेको छ।
अप्रिल १५, २०२६ मा जारी प्रेस विज्ञप्तिमा एनआरएनए अमेरिकाले उक्त योजनालाई नेपालका लागि ऐतिहासिक र सकारात्मक पहलका रूपमा लिएको उल्लेख गर्दै सरकारप्रति आभार व्यक्त गरेको छ। यसले विश्वभर रहेका नेपालीहरूलाई मातृभूमिसँग अझ नजिक ल्याउने विश्वास पनि व्यक्त गरिएको छ।
विज्ञप्तिअनुसार, योजनामा गैरआवासीय नेपालीका लागि नागरिकता निरन्तरता, सम्पत्ति अधिकार तथा मतदान अधिकार सुनिश्चित गर्ने विषय समेटिनु महत्वपूर्ण उपलब्धि भएको एनआरएनएको भनाइ छ। साथै, विदेशमा रहेका नेपालीहरूको ज्ञान, सीप, अनुभव र पूँजीलाई “ब्रेन गेन” का रूपमा उपयोग गर्ने सरकारको सोचलाई पनि प्रशंसनीय कदम मानिएको छ।
एनआरएनए अमेरिकाले पूर्वाधार विकास, उच्च शिक्षा, स्वास्थ्य सेवा, अनुसन्धान, खेलकुद तथा पर्यटन क्षेत्रमा डायस्पोराको सक्रिय सहभागिता आवश्यक रहेको औंल्याउँदै सबै गैरआवासीय नेपालीलाई नेपालमा लगानी तथा राष्ट्र निर्माणमा सहभागी हुन आह्वान गरेको छ।
यसैबीच, एनआरएनए अमेरिकाका अध्यक्ष Bikash Upreti ले अब हस्ताक्षर संकलन वा डेलिगेसन जस्ता कार्यक्रमभन्दा सरकारलाई सहयोग गर्ने दिशामा ध्यान दिनुपर्ने बताएका छन्।
उनका अनुसार, “हामीले डेलिगेसन र हस्ताक्षर अभियान पहिलो बैठकबाटै पारित गरेका थियौं, तर नयाँ सरकारको आधिकारिक धारणा के आउँछ भनेर कुरिरहेका थियौं। अहिले धारणा स्पष्ट भइसकेपछि ती कार्यक्रमहरू स्थगित गरेर अब कार्यान्वयनमा ध्यान दिने निर्णय गरिएको छ।”
अन्त्यमा, नेपाललाई समृद्ध र आत्मनिर्भर बनाउने लक्ष्यसहित ल्याइएको यस योजनाको सफल कार्यान्वयनका लागि एनआरएनए अमेरिकाले नेपाल सरकारलाई पुनः धन्यवाद दिँदै शुभकामना व्यक्त गरेको छ।
