राम प्रशाद अधिकारी , टेक्सास
गैरआवासीय नेपाली संघ, राष्ट्रिय समन्वय परिषद् (एनसीसी) अमेरिकाको हिजो (2025 April 30) सम्पन्न १०औं कार्यसमिति बैठकमा सदस्यता प्रणालीसम्बन्धी विषयमा गम्भीर बहस र छलफल भएको छ। बैठकको सुरुआतमा महासचिवले एनआरएनए एनसीसी अमेरिका द्वारा तयार गरिएको सदस्यता पोर्टलको डेमो प्रस्तुति प्रस्तुत गरेका थिए।
बैठकमा अमेरिकाको आफ्नै पोर्टलमार्फत सदस्यता खोल्ने कि अन्तर्राष्ट्रिय समन्वय परिषद् (आईसीसी) अन्तर्गतको MIS प्रणालीमार्फत सदस्यता सञ्चालन गर्ने भन्ने विषयमा कुनै स्पष्ट निर्णय नआइ बैठक निष्कर्षविहीन रूपमा टुंगिएको हो।
हालको परिस्थिति अनुसार एनसीसी अमेरिकाभित्र दुई फरक धार स्पष्ट देखिएको छ। ५४ जना पदाधिकारी सहभागी बैठकमा २६ जनाले सदस्यता सम्बन्धी धारणा राखेका थिए। तीमध्ये १३ जनाले सदस्यता MIS प्रणालीमार्फत खोलिनुपर्ने मत व्यक्त गरे भने बाँकी १३ जनाले हालको संवेदनशील अवस्थालाई ध्यानमा राख्दै अमेरिकाको आफ्नै पोर्टलमार्फत सदस्यता सञ्चालन गर्नुपर्ने धारणा राखे।
करिब ६ घण्टा लामो उक्त बैठक आरोप–प्रत्यारोप र गहिरो असहमतिका कारण केही समय तनावपूर्ण बनेको थियो। १३औं वार्षिक साधारण सभाले सदस्यता प्रणाली एनसीसी अमेरिकाको आफ्नै पोर्टलबाट सञ्चालन गरिनुपर्ने उल्लेख गर्दै, यदि सदस्यता ICC को MIS प्रणालीमार्फत खोल्नुपर्ने भएमा कार्यसमितिका दुई तिहाइ बहुमत आवश्यक पर्ने स्पष्ट व्यवस्था गरेको छ। तर अध्यक्ष पक्षले संघको विधानको आफ्नै व्याख्या गर्दै MIS प्रणालीबाटै सदस्यता खोल्ने प्रयास गरे तापनि त्यो सफल हुन सकेन।
उक्त बैठकले एनसीसी अमेरिकाभित्र बढ्दो ध्रुवीकरणलाई थप उजागर गरेको छ र आगामी दिनमा सदस्यता प्रक्रिया कुन दिशामा अगाडि बढ्ने भन्ने विषय अझै अन्योलमा रहेको स्पष्ट देखिन्छl
