सारदा धिताल
ओहायो, अगस्ट २
गैरआवासीय नेपाली संघ (एनआरएनए) ओहायो च्याप्टर र नेपालको बाणिज्य दूतावास ओहायोको संयुक्त आयोजनामा दुई दिने राहदानी तथा कन्सुलर सेवा सम्बन्धी घुम्ती शिविर सम्पन्न भएको छ।
ओहायो तथा वरपरका क्षेत्रमा बसोबास गर्ने नेपालीहरूले वासिङ्टन डिसी जस्ता टाढा यात्रा नगरी आवश्यक सेवा प्राप्त गर्न सकून् भन्ने उद्देश्यले यो शिविर सञ्चालन गरिएको थियो । यसबाट समय, खर्च तथा श्रमको बचत हुनुका साथै स्थानीय नेपालीहरूलाई सजिलो भएको ओहायो च्याप्टरले जनाएको छ।
विभिन्न राज्यबाट सहभागी भएका करिब १५० जनाले सो शिविरबाट सेवा प्राप्त गरेका थिए। नेपाल सरकारको तर्फबाट आर्थिक मामिलाका काउन्सिलर (परामर्शदाता) युगराज पाण्डेको नेतृत्वमा आएको टोलीमा जिना अधिकारी, रामजी दाहाल, यज्ञप्रसाद रेग्मी र रामबहादुर लामाले राहदानी तथा कन्सुलर सेवा उपलब्ध गराएका थिए।
कार्यक्रममा ओहायो राज्यका अवैतनिक वाणिज्य दूत डा. दामोदर पौडेल, एनआरएनए च्याप्टरका बोर्ड सदस्यहरू, विभिन्न संघसंस्थाका प्रतिनिधिहरू तथा गर्मी बिदामा रहेका विद्यार्थीहरूले स्वयंसेवकको रूपमा सक्रिय भूमिका निर्वाह गरेका थिए। उनीहरूको स्वस्फूर्त सहभागिताले कार्यक्रम छरितो र प्रभावकारी रूपमा सम्पन्न हुन सकेको थियो।
हिमाली हेरिटेज क्युइजिन र इन्ट्राफाउण्डेशन संस्थाले कार्यक्रम स्थल उपलब्ध गराई महत्वपूर्ण सहयोग गरेका थिए।
शिविरको समापन ओहायो च्याप्टरका अध्यक्ष होताराम विश्वकर्माले गर्नुभएको थियो भने कार्यक्रमको सञ्चालन सचिव लोकेन्द्र देवकोटाले गर्नुभएको थियो।
