आगामी आगस्ट १०, आइतबार, अमेरिकाको टेक्सासस्थित भेटघाट रेष्टुरेन्टमा दिउँसो १:०० बजेदेखि ३:०० बजेसम्म अन्तरक्रिया कार्यक्रम आयोजना हुने भएको छ। उक्त कार्यक्रममा नेपाल सरकारका माननीय सांसद ज्ञानेन्द्र शाही विशेष अतिथि रहनेछन्।
NRNA टेक्सास च्याप्टरको आयोजनामा र पानस अमेरिकाको सहकार्यमा हुने सो कार्यक्रमको बारेमा टेक्सास च्याप्टरका अध्यक्ष निलेश श्रेष्ठले जानकारी दिएका छन्।
श्रेष्ठका अनुसार, कार्यक्रममा टेक्सासमा बसोबास गर्नु हुने सम्पूर्ण नेपालीहरूलाई उपस्थित भई कार्यक्रमलाई सफल बनाउन अनुरोध गरिएको छ। साथै, प्रवासमा रहेका नेपालीहरूको मनमा रहेका जिज्ञासाहरू सांसद शाही समक्ष राख्न पनि यो एउटा महत्वपूर्ण अवसर हुने बताइएको छ।
श्रेष्ठले भने, “नेपालबाट आउने सबै माननीयहरू नेपालको प्रतिनिधित्व गर्दै आउनुहुन्छ। प्रवासमा रहेका नेपालीहरूका विचार र समस्या प्रत्यक्ष रूपमा जनप्रतिनिधिसँग साझा गर्न सकियो भने, ती आवाज नेपाल सरकार र संसदसम्म पुग्नेछ। ‘एक चोटिको नेपाली, सधैँको नेपाली’ भन्ने नारा नारामा मात्र सीमित नरहोस् भनेर यस्ता अन्तरक्रिया कार्यक्रम आवश्यक छन्।”
