मेरिल्याण्ड राज्यको डिष्ट्रिक ७ एबाट नेपाली मूलका युवा नेता सतीश चापागाईले स्टेट डेलिगेट पदका लागि आफ्नो चुनावी अभियान औपचारिक रूपमा सुरु गरेका छन्। उनले गत महिना नै उम्मेदवारी दर्ता गरिसकेको जानकारी हालै आयोजित चुनावी प्रचार कार्यक्रममा दिएका हुन्।
मेरिल्याण्डमा रहेका नेपाली समुदायको भव्य उपस्थितिबीच चापागाईले आफू निर्वाचनमा होमिनुको उद्देश्य र योजना प्रस्तुत गर्दै सहयोगका लागि अपिल गरेका थिए। कार्यक्रममा सहभागीहरूले चापागाईको बहुआयामिक व्यक्तित्वको प्रशंसा गर्दै उनलाई तन, मन र धनले सहयोग गर्ने प्रतिबद्धता व्यक्त गरेका थिए।
आगामी नोभेम्बरमा हुने मुख्य निर्वाचन अघि, यही जुन २३ मा प्राइमरी निर्वाचन हुने तय भएको छ। सो प्राइमरीमा डेमोक्रेटिक पार्टीभित्र २ सिटका लागि ४ जना उम्मेदवार प्रतिस्पर्धामा छन्। चापागाईसँगै लिडिया ब्राउन, चम बेकर र क्लिभलेण्ड रेनोल्ड जुनियर प्रतिस्पर्धामा रहेका छन्।
हाल चापागाई सोही डिष्ट्रिकबाट डेमोक्रेटिक पार्टीका केन्द्रीय सदस्यका रूपमा सक्रिय छन्। चार वर्षअघि सम्पन्न निर्वाचनमा उनले ४,१०० मत प्राप्त गर्दै उक्त पदमा विजय हासिल गरेका थिए।
“पार्टीकै साथीहरूको सल्लाह, सुझाव र सहयोगबाट मैले उम्मेदवारी दर्ता गराएको हुँ,” चापागाईले बताए।
यदि प्राइमरी निर्वाचनमा विजय हासिल गरेमा, उनले नोभेम्बरमा रिपब्लिकन उम्मेदवारसँग प्रतिस्पर्धा गर्नुपर्नेछ।
पछिल्लो तथ्यांकअनुसार करिब ८३ हजार जनसंख्या रहेको यस डिष्ट्रिकमा करिब ४ प्रतिशत एशियाली मूलका बासिन्दा छन्। मतदाता संरचनाअनुसार ४४.९ प्रतिशत रिपब्लिकन, ३४.७ प्रतिशत डेमोक्र्याट र १८.९ प्रतिशत स्वतन्त्र (इन्डिपेन्डेन्ट) मतदाता रहेका छन्।
