अक्टोवर ३१ टेक्सस , अर्जुन न्यौपाने
अमेरिकाका विभिन्न राज्यहरुमा नेपालीहरुको जनघनत्व बढेसँगै उक्त क्षेत्रमा रहेका कम्पनी र कार्यालयहरुमा पनि नेपाली कर्मचारीहरुको बाहुल्यता दिनप्रतिदिन बढ्दै गईरहेको छ । जहाँ जसको जनघनत्व बढ्छ त्यहाँ त्यस समुदायसँग सम्बन्धित भाषा ,संस्कृति ,चाडपर्व रीतिरिवाज परम्पराहरु पनि सँगै जोडिएर आउने गर्दछन् । नेपालीहरु विश्वका जुनसुकै देश र क्षेत्रमा छरिएर रहेतापनि आफ्नो धर्म र संस्कृतिलाई प्राथमिकतामा साथ दिएर रमाउने गर्दछन् । अमेरिकामा सर्वाधिक नेपाली बसोबास गर्ने टेक्सस राज्यका विभिन्न कार्यालयहरुमा अब नेपालीहरुको हैकम जम्न थालेको देखिन्छ ।यसको ज्वलन्त उदाहरण फोर्थवर्क ह्यासलेटमा रहेको एक अमाजोन कम्पनीमा अक्टोवर ३० दिनका दिन देखिएको तिहार विशेष कार्यक्रममा देख्न सकिन्थ्यो ।
सयौ नेपालीहरुले काम गर्ने अमाजोन कम्पनीमा अधिकांश नेपाली कर्मचारीहरु कार्यरत रहेका छन् ।कम्पनीमा कार्यरत नेपाली कर्मचारीद्वारा आयोजना गरिएको तिहार विशेष कार्यक्रममा २०० भन्दा बढीको सहभगीता रहेको थियो । कम्पनीमा कार्यरत प्रशासनिक पदाधिकारीहरुको साथमा अन्य भाषा र धर्म संस्कृतिका व्यक्तिहरुलाई समेत कार्यक्रममा आमन्त्रण गरिएको थियो । आमन्त्रित अन्य भाषीहरुले कार्यक्रमबारे चासो र उत्साहका साथ हौसला दिईरहेका थिए । तिहार विशेष शुभकामना आदान-प्रदानको व्यानर सहित लक्ष्मीपूजा र साथमा रंगोली एवम् देउसी भैलो गीतले माहोल नेपालीमय रंगमन्च भएको थियो । कम्पनीमा कार्यरत कर्मचारी तथा कलाकर्मी प्रदिप बास्तोलाले कार्यक्रममा तिहार पर्वबारे जानकारी गराउँदै देउसीभैलो गीतको साथमा सांगितिक खुराक पस्किरहनु भएको थियो । मरिचमान सुनार र राधा सुनारद्वारा प्रस्तुत जोडीको लक्ष्मीपूजा सम्बन्धि कुशल नृत्यले उपस्थितका लागि नेपालीपनको आभाष दिलाएको पाईन्थ्यो ।नेपाली मौलिक पोशाकमा समेत सजिएका नेपाली कर्मचारीहरु हर्षोल्लासका साथ गीतमा झुमिरहेका थिए ।तिहारमा विशेष गरेर तयार गरिने सेल रोटी र नेपाली मौलिक खानाको स्वादमा उपस्थितले मनोरन्जन लिईरहेको पाईन्थ्यो । केहि वर्षदेखि कम्पनीमा नेपाली कार्यक्रमहरु गर्दै आईरहेको र अबका भावी दिनमा समेत नेपाली मौलिक कार्यक्रमलाई निरन्तरता दिने कुरा सक्रिय व्यक्तित्व राजेश पुडासैनीले रिपोटर्स क्लब अमेरिकाका प्रतिनिधिलाई जानकारी दिनुभयो ।
Sent
Enter
