नायिका अन्जु श्रेष्ठको नयाँ गजल सार्वजनिक भएको छ । अमेरिका निवासी गजलकार भूपेन्द्र महतको शब्द तथा दिप घतानीको संगीतमा रहेको यो मायाँ नि कस्तो गजल शुक्रबार भिडियो सहित सार्वजनिक भएको हो ।
सञ्जिव बराईलीको संगीत संयोजन रहेको गीतको भिडियोलाई राजेश पुमा राईले निर्देशन गरेका हुन् । प्रेमको गहिराईका भिन्न भिन्न आयामहरुलाई उत्तिकै महत्वका साथ हेरिएको यस गीतमा संयोग र वियोगको अवस्थालाई स्वकार भावमा रहेर कलात्मक रुपमा चित्रण गरिएको गजलको भिडियोमा गायिका श्रेष्ठ स्वयंको अभिनय देख्न सकिन्छ ।
उत्सव दाहालको छायाँकन तथा विकास दाहालको सम्पादन रहेको भिडियोको प्रोडक्सन म्यानेजरमा दिपेन्द्र गौतम रहेका छन् । नेपाली साहित्यिक र साँगीतिक क्षेत्रमा पृथक छवि स्थापित गजलकार महत र गायिका श्रेष्ठको यो पहिलो सहकार्य हो ।
कलानिधी ईन्दीरा संगीत महाबिधालयबाट शास्त्रिीय संगीतमा डिप्लोमा गरेकी गायिका श्रेष्ठले वि.सं २०७२ सालमा आफ्नै शब्द र स्वरमा रातो साडी बोलको तिज गीत मार्फत औपचारिक संगीत यात्रा सुरु गरेकी हुन् । एक दशक लामो निरन्तरको साँगीतिक यात्रामा उनका विविध विधामा दर्जनौं गीतहरु सार्वजनिक छन् ।
रातो साडी, रंगीयो तिजले, खोजिरहेछु, ढाकाटोपी, लगायतका गीतहरु हुँदै सुरु भएको गायिका श्रेष्ठको पछिल्लो समय सार्वजनिक गीतहरु तिमिसंगै र खोला जस्तो जिन्दगी पनि सकारात्कम चर्चा सहित अघि बढिरहेका छन् भने नयाँ उनका केही गीतहरु सार्वजनिकको अन्तिम तयारीमा रहेका छन् ।
